Nyɔ Tʋ "bo kpʋʋan sɩn 'sɔɔn ɔɔ' baewlu‑
5
Dafi 'a 'dʋ ‑ɛ ‑crɩɩa' 'de 'dʋ ‑jeopoi 'a 'sbɛ 'di ɛ. ‑Kwɛin mɛ ‑ɛɛ poo ɛɛ' 'dʋ tu o.
2 'Oo Tʋ "bo, ‑ɩn po 'ma baewlu ke 'ma kplewlu doun" o.
3 ‑Mɔ ‑nɩa 'ma 'beɔ, ‑mɔ ‑nɩa 'ma Kea a,
‑ɩn po 'ma 'dawlu doun" o, ‑mɔ 'ma po baewlu o.
4 Tʋ "bo 'ma kpʋɛn ‑suu ‑kɛ'' 'wɔn 'ma jea ‑ʋn bae 'de 'wɩ "o 'wɩ 'di,
'ma sɔn 'ʋn 'ɛ ‑sɔn' wɔin" 'ma jea i ‑te 'ma jea ‑ʋn fuo.
5 Dɛ ‑nʋɛ ɛmɛ ‑nɩ ‑mɔ Kea ‑maa' 'je dɛsaʋnʋɩ 'a "dia,
'diwɔnynii seɛ 'bɛɛ‑ ɔ 'je ‑ʋn "juɛi ji.
6 Nyɔ ‑ɔɔ wlu nyniia wɔn seɛ 'bɛɛ‑ ɔ 'je inyna 'de ‑ʋn "juɛi.
‑Ɩn ‑nyɛ dɛsaʋnʋʋ ‑wee'‑ 'ʋn 'ɛ.
7 ‑Ma ‑sa' sɩ 'tmʋʋ‑ ‑wee'‑ "klein 'a ma" i,
"ku 'dbaʋn ke nyʋ 'srɛ i pooʋn ‑mʋ ‑wi" a nyaa ‑mii' Tʋ "bo.
8 'De ‑ma nyiɔɔ' ‑tɩ' kmaa' ‑sea' ‑kwɛ ‑ta 'ble 'a ‑tɩ' 'ʋn ɛ,
'ɩn 'bɛɛ' 'ɩn 'je 'de ‑ɩn o ‑gbu" 'di pa, ‑wɛe ‑ma ni' ‑tea' 'a ‑tɩ' 'ʋn ɛ,
'ɩn 'je "jru ‑kwlu' po, 'ɩn 'je ‑ʋn "juɛi ‑gbɛɛ'‑ 'de ‑ma ‑gbu" ‑kwea i 'di.
9 Tʋ "bo, ‑mɔ ‑sreai" ɛ, ‑ɩn po 'ʋn ‑je o,
dɛ ‑nʋɛ 'ɩn 'bleɛ 'ʋnyɛ ‑ʋn. ‑Jeblʋ ‑ɩn ‑nɩa "i 'ɩn jea kpa, ‑ɩn ‑tɛɛn ɛ ‑kwlʋ.
10 Ʋʋa' 'tmʋʋtɩ‑ ‑wee'‑ "klein nɩɛ 'de 'srɛ 'dii,
dɩ dooa' 'a 'sʋ mɩ ʋʋa naa tɔ' "kpei.
‑Bo ʋʋ 'bai wɔn 'sʋ ka nyɔ 'ɔ kaian ‑gbaɩn' "wɛin ɛ; ʋʋa nʋɛ mɩɩɔ 'dɩdɩ
11 'Oo Kea, ʋʋ 'je ʋʋa' dɩsaɩn 'a ‑kao,
‑wɛe ʋʋa' 'srɛ 'jeɛ nʋ ʋʋ 'je i sɔn‑,
‑wɛe ʋʋa' dɩsaɩn ʋʋ nʋa ʋʋa ‑sa de 'a ‑tɩ' 'ʋn ɛ
‑ɩn ‑je ʋʋpʋ‑ i nʋ 'oo Kea, dɛ ‑nʋɛ ʋʋ nynaa "jru i.
12 'Kaa nyʋ "klein ‑wlaa' ‑ʋn sro' ɛ,
ʋʋa "wɔɔ ʋʋa jea 'mʋa‑ nʋ 'de 'wɩ 'oo 'wɩ ‑wee'‑ 'di dɛ ‑nʋɛ,
ʋʋ nɩɛ 'de ‑ma ‑fli ‑sɔn,
‑wɛenyʋ "klein ‑ʋʋa ‑jea ‑ma "dia a ʋʋ nʋ 'mʋa‑
13 Tʋ "bo, ‑ma poɛ "isrɛi "diwan‑ ‑wɛe ‑ma nʋɔ 'saaʋn "jrii
ka dɛ ‑ɛɛ kaan nyʋ "i nɩa.